ကြည်ဝေ | မေ ၁၅၊ ၂၀၀၈
လှိုင်သာယာမြို့နယ် အမှတ် (၄၄) အမက ကျောင်းအနီးတွင် မိုးရေစိုရွှဲနေသော အ၀တ်အထည်များနှင့် လူအစုစု တို့ကို မိုးရေတွေအောက်မှာ အမိုးအကာမပါဘဲဟိုမှာ ဒီမှာ ထိုင်လျက်ရှိတာကိုတွေ့မြင်ရပါတယ်။
အဲဒီ လူအစုစုတို့ဟာ လှိုင်သာယာ အမက အမှတ် (၄၄) ကျောင်းက နှင်ထုတ်လိုက်တဲ့လေဘေးဒုက္ခသည်တွေ ဖြစ်ကြပြီး သွားစရာနေစရာ နေရာမရှိသောကြောင့် ခုလိုထိုင်နေကြတာဖြစ်တယ်လို့ သူတို့တွေက ပြောပြကြပါတယ်။
လေဘေးဒဏ်ထိ သန်လျင်မြို့နယ် ကျိုက်အင်းကျေးရွာရှိ ဖြစ်သလို ပြန်ဆောက်ထားသော အိမ်တလုံး (ဓာတ်ပုံ - ဧရာဝတီ)
မိုးရေထဲမှာ ထိုင်နေကြတဲ့ ဒုက္ခသည်တွေမှာ ကလေးငယ်တွေနဲ့ သက်ကြီးရွယ်အိုတွေပါဝင်ကြတာ တွေ့ရသလို နာမကျန်း ဖြစ်နေသူတွေလည်း ပါဝင်နေတာ တွေ့မြင်ရပြီး မနက်စာတောင် မစားရသေးကြောင်း သိရပါတယ်။
သူတို့တွေဟာ မိုးစက်တွေအောက်မှာ ပလတ်စတစ်တွေကိုခေါင်းမြီးခြုံတဲ့သူက ခြုံနဲ့ မလုံမခြုံနေထိုင်နေကြရပြီး တချို့ ကလည်း မိုးခိုစရာ နေရာအဖြစ် ကျောင်းရဲ့ အုတ်နံရံကို မှီပြီး မိုးခိုနေကြတာ တွေ့မြင်ရပါတယ်။
“နေစရာ တဲပြန်ဆောက်ဖို့ မပြောပါနဲ့ စားစရာ အိုးခွက်ပန်းကန်တောင်မရှိတော့တာ၊ ဘယ်နှယ်လုပ်ရမလဲ” လို့ အသက် ၆၆ နှစ်အရွယ် လေဘေး ဒုက္ခသည်အမျိုးသမီးက မိုးရေတွေစိုရွှဲပြီး ခိုက်ခိုက်တုန်နေတဲ့ကြားက ပြောပြ ခဲ့ ပါတယ်။
သူမ အပါအ၀င် ကျောင်းထဲမှာ နေထိုင်တဲ့ လှိုင်သာယာ မြို့နယ် ၁၅ ရပ်ကွက်မှ လေဘေးဒုကသည်တွေ အားလုံးကို သက်ဆိုင်ရာ တာဝန်ရှိသူတွေက ဒီနေ့ မနက်စောစောကပဲ ကျောင်းထဲကနေထွက်သွားဖို့ နှင်ထုတ် ခဲ့ကြောင်း သူမက ပြောပြပါတယ်။
အများစုဟာ မုန်တိုင်းဒဏ်ကြောင့် ပျက်စီးသွားတဲ့ အိမ်တွေကို ပြန်လည်ထူထောင်နိုင်ဖို့ မတတ်နိုင်တော့တဲ့ အတွက် ခုလို ဒုက္ခသည် စခန်းမှာလာရောက်နေထိုင်ကြရခြင်းဖြစ်ပါတယ်။
အဆိုပါ ဒုက္ခသည်များအနေနဲ့ တဲအိမ်ပြန်လည်ထူထောင်ဖို့ထက် နေ့စဉ်စားသောက်ဖို့ အိုးခွက်ပန်းကန်များကစ အခက် အခဲရှိနေပြီး ခုလိုနှင်ထုတ်တဲ့အခါမှာလည်း လမ်းမပေါ်မှာနေရုံကလွဲလို့ တခြားသွားစရာနေရာမရှိပါဘူး လို့ ဆိုကြပါတယ်။
စစ်အာဏာပိုင်များအနေနဲ့ စာသင်ကျောင်းများထဲမှာ နေထိုင်နေကြတဲ့ ဒုက္ခသည်တွေကို မေလ ၇ ရက်နေ့မှ စတင်နှင် ထုတ်နေခဲ့ပြီး ၁၅ ရက်နေ့နောက်ဆုံးထား ထွက်ပေးရမယ်လို့ ကြေညာခဲ့ပါတယ်။ ဒီနေ့ မနက်စောစော မှာ ကျောင်းဝန်း အတွင်း နေထိုင်ကြတဲ့ လက်ကျန် ဒုက္ခသည်ပေါင်း ၆၀ ကျော်ကိုကျောင်းဝန်းထဲကနေ ပြင်ပကို ဆွဲထုတ်ခဲ့ကြောင်း ဒုက္ခ သည်များရဲ့ပြောပြချက်များအရ သိရှိရပါတယ်။
တခြားရန်ကုန်တိုင်းအတွင်းရှိ မြို့နယ်တွေမှာလည်း စာသင်ကျောင်းတွေမှာ ဖွင့်လှစ်ထားတဲ့ ဒုက္ခသည်စခန်း တွေကို ရှင်းလင်းဖို့အတွက် ဒုက္ခသည်တွေကိုမောင်းထုတ်နေကြောင်း ကြားသိရပါတယ်။
“ကျောင်းဖွင့်ချိန် နီးလို့ဆိုပြီး ဒုက္ခသည်တွေကို သူတို့ရဲ့ပျက်သွားတဲ့အိမ်တွေဆီကို ပြန်ဆောက်ပြီး ပြန်နေကြဖို့ ပြန်လွှတ် တယ်၊ အများစုက ပြန်ဆောက်နိုင်လောက်အောင် အင်အားမရှိကြတော့ဘူးဆိုတော့ နောက်ဆုံးနေလို့ ရတဲ့ အထိနေကြတာ ပေါ့”လို့ ဒုက္ခသည်စခန်းမှ တာဝန်ရှိသူ တဦးက ပြောဆိုပါတယ်။
တောင်ဒဂုံမြို့နယ်မှ နှင်ထုတ်ခံခဲ့ရသူ လေဘေးဒုက္ခသည်တဦးကတော့ သူတို့နေတဲ့ ဒုက္ခသည်စခန်းကို အစိုးရ အနေနဲ့ မေလ ၂၄ ရက်နေ့ ဆန္ဒခံယူပွဲမှာ မဲရုံ အဖြစ် ဆောက်လုပ်ဖို့အတွက်သူတို့ကို နှင်ထုတ်ခြင်းဖြစ် ကြောင်း ပြောပြပါတယ်။
“ကျနော်တို့ကို အခု ဘုန်းကြီးကျောင်းက ခေါ်ထားပေးတယ်၊ ဘုန်းကြီးကျောင်းမှာ ကျနော်တို့ မိသားစုအပြင် တခြားလူ တွေကော အများကြီးပဲ စုစုပေါင်း အယောက်၂၀၀ ကျော်လောက်ရှိမယ်”လို့ သူက ပြောပြပါတယ်။
ပြည်တွင်းပြည်ပ မှ အကူညီအထောက်အပံ့ပေါင်းမြောက်များစွာ လက်ခံရရှိတဲ့ စစ်အစိုးရအနေနဲ့ ဒုက္ခသည် တွေကို စခန်း တွေကနေ နှင်ထုတ်ဖယ်ရှားနေချိန်မှာ အကူအညီအထောက်အပံ့မရရှိတဲ့ ဘုန်းတော်ကြီးကျောင်း တွေကနေလက်ခံ ကျွေးမွေးနေတဲ့ အဖြစ်အပျက်ကို တွေ့မြင်ရတဲ့အတွက် ဒုက္ခသည်များအနေနဲ့ သံဃာတွေ အပေါ် ပိုပြီး ကြည်ညိုကိုးစား မိတယ်လို့ ပြောဆိုကြပါတယ်။
လှိုင်သာယာမြို့နယ်ထဲက ဘုန်းကြီးကျောင်းတခုမှာလည်း စခန်းကနေ နှင်ထုတ်လိုက်လို့ ရောက်ရှိလာတဲ့ ဒုက္ခသည်တွေကို လက်ခံထားရှိပြီးကျွေးမွေးနေကြောင်း အဆိုပါ ဘုန်းကြီးကျောင်းမှာ နေထိုင်သူ တဦးက
ပြောပြပါတယ်။
“အရင်တုန်းက ဘုန်းဘုန်းကျောင်းမှာ ဒုက္ခသည်ပေါင်း ၅၀ လောက်ပဲရှိတာ၊ ခုရက်ပိုင်း စခန်းတွေကနေ ဖယ်ခိုင်းလို့ဆိုပြီး ဒုက္ခသည်တွေ ရောက်ရောက်လာကြတာနဲ့ ခုဆို အယောက် ၁၀၀ ကျော်လောက်ရှိတယ်၊ ဘုန်းဘုန်း ကတော့ လာသမျှ လက်ခံပြီး ကျွေးတာပဲ”လို့ သူက ဆိုပါတယ်။
ဒုက္ခသည်တွေအနေနဲ့ စခန်းကနေ နှင်ထုတ်ခံရပြီး နောက်ပိုင်း ဘုန်းကြီးကျောင်းတွေမှာ သွားရောက် နေထိုင်ကြပါတယ်။ အများစုကတော့ ဘုန်းတော်ကြီးကျောင်းမှာ နေထိုင်ရင်း အိမ်ပြန်ဆောက်နိုင်ဖို့ အတွက် ကြိုးပမ်းနေကြ တာ တွေ့မြင်ရပါတယ်။
ရန်ကုန်တိုင်းအတွင်းမှာ ရှိတဲ့ ဘုန်းကြီးကျောင်းတွေမှာ ဒုက္ခသည်တွေလာရောက်နေထိုင်ကြပေမယ့် စစ်အာဏာပိုင်များ အနေနဲ့ အဆိုပါဘုန်းကြီးကျောင်းတွေကို ဒုက္ခသည်တွေအတွက် လာရောက်လှူဒါန်းခြင်းမျိုးလုံးဝ မရှိ သလို အသိအမှတ်ပြုခြင်းလည်း မရှိကြောင်း ကြားသိရပါတယ်။
အဲဒီအပြင် ဘုန်းကြီးကျောင်းမှာ နေထိုင်တဲ့ ဒုက္ခသည်တွေအတွက် တနိုင်တပိုင်လာရောက်လှူဒါန်းသူတွေ ရှိ ပေမယ့် ရောက်ရှိနေထိုင်ကြတဲ့ ဒုက္ခသည်အရေအတွက်နဲ့ စာရင် နည်းပါးနေသေးတဲ့အတွက် ဘုန်းတော်ကြီး ကျောင်း တချို့မှာ ဒုက္ခသည်တွေကို တနေ့ ထမင်းတနပ်နဲ့ဆန်ပြုတ်တနပ်ပဲ ကျွေးနိုင်တော့တယ်လို့ သိရှိရပါ တယ်။
“ဘုန်းဘုန်းကတော့ နောက်ဆုံးကျွေးစရာမရှိတော့ရင်တောင် ဒုက္ခသည်တွေကို နှင်ချဖို့ ဘယ်တော့မှ မစဉ်းစား ဘူး၊ မဖြစ်ဖြစ်အောင် ကျွေးထားမှာပဲ၊ အခုအရေးတကြီးလိုအပ်နေတာ သူတို့အတွက် ကျန်းမာရေးဆေးဝါးတွေပဲ၊ နေမကောင်း တဲ့သူတွေ တော်တော်များများရှိနေတယ်”လို့ လှိုင်သာယာမြို့နယ်တွင်းမှ ကျောင်းထိုင်ဘုန်းကြီး တပါးက ပြောဆိုပါတယ်။
ဘုန်းကြီးကျောင်းတွေမှာ နေထိုင်တဲ့ ဒုက္ခသည်တွေအနေနဲ့ စစ်အာဏာပိုင်တွေက လေဘေးဒုက္ခသည်တွေအတွက် ရောင်းချပေးမယ့် ဆီ၊ ဆန်၊ ဆား၊ သွပ်နဲ့အိမ်ဆောက်ပစ္စည်းတွေ ၀ယ်ယူခွင့်မရှိဘူး လို့ ပြောဆိုသံတွေ ကြားရကြောင်း ဘုန်းကြီးကျောင်းမှာ နေရသူတွေရဲ့ ပြောပြချက်အရ သိရှိရပါတယ်။
ပျက်စီးသွားတဲ့ ကိုယ့်နေရာမှာ ပြန်နေသူများကိုသာ လိုအပ်တဲ့ ပစည်းတွေ ရောင်းချပေးမှာ ဖြစ်တယ်လို့ ရယကနဲ့ ကြံ့ဖွံ့တွေက ကြေညာထားကြောင်းလည်း ဒုက္ခသည်တွေက ပြောပြကြပါတယ်။ ။
Friday, May 16, 2008
မြေနိမ့်ရာ လှံစိုက်ခံရသူများ ( ကျနော်တော့ ဒီသတင်းကို ဖက်ပြီး မျက်ရည်ကျမိပါတယ်။ တတ်နိုင်သလောက် ထပ်မံကူညီကြပါဦးဗျာ)
Posted by Myo Myint Aung at 11:19 AM
Labels: သတင်း ကူးယူဖော်ပြသည်
Subscribe to:
Post Comments (Atom)
No comments:
Post a Comment