မြန်မာပြည် ဖွဲ့စည်းပုံဆိုင်ရာ ရက်စွဲများ (၁၉၄၇ -၂ဝဝ၈)

မဇ္ဈိမသတင်းဌာန
ကြာသပတေးနေ့၊ မေလ 15 2008 16:45 - မြန်မာစံတော်ချိန်


၁၉၄၇၊ ဖေဖော်ဝါရီ

မြန်မာပြည်၏ ပထမဆုံးနှင့်အကောင်းဆုံးဟု သတ်မှတ်သော ဖွဲ့စည်းပုံအခြေခံဥပဒေကို ရေးဆွဲသည်။

၁၉၄၈၊ ဇန်နဝါရီ (၄)

ဗြိတိသျှလက်အောက်မှ လွတ်လပ်သော နိုင်ငံဖြစ်လာပြီးနောက် ၁၉၄၇ ဖွဲ့စည်းပုံ အသက်ဝင်လာသည်။



၁၉၇၄ မတ်လ

ဒုတိယမြောက် ဖွဲ့စည်းပုံကို လူထုဆန္ဒခံယူပွဲဖြင့် အတည်ပြုသည်။ ၁၉၆၂ ခုနှစ်တွင် အာဏာသိမ်းသော တော်လှန်ရေးကောင်စီလက်ထဲမှ အာဏာကို မြန်မာ့ဆိုရှယ်လစ် လမ်းစဉ်ပါတီ (မဆလ) လက်သို့ လွှဲပေးသည်။

၁၉၈၈ စက်တင်ဘာ (၁၈)

(၈) လေးလုံး လူထုအုံကြွမှုကို ဖြိုခွင်းပြီးနောက် နိုင်ငံတော်ငြိမ်ဝပ်ပိပြားမှုတည်ဆောက်ရေးအဖွဲ့ (နဝတ) သည် အာဏာအရပ်ရပ်ကို သိမ်းယူသည်။ ဒုတိယမြောက်ဖွဲ့စည်းပုံလည်း ပျက်ပြယ်သွားသည်။

၁၉၉ဝ မေလ (၂၇)

ဒေါ်အောင်ဆန်းစုကြည် ဦးဆောင်သော အမျိုးသားဒီမိုကရေစီ အဖွဲ့ချုပ်သည် ရွေးကောက်ပွဲတွင် ပါလီမန် အမတ်နေရာ ၄၈၅ နေရာအနက်မှ ၃၉၂ နေရာကို အနိုင်ရသည်။ ဦးခွန်ထွန်းဦး ခေါင်းဆောင်သော ရှမ်းအမျိုးသား ဒီမိုကရေစီအဖွဲ့ချုပ်က ဒုတိယလိုက်သည်။

၁၉၉ဝ ဇူလိုင် (၂၇)

နဝတ က အမိန့်အမှတ် (၁/၉ဝ)ကို ထုတ်ပြန်သည်။ ရွေးကောက်ခံ ကိုယ်စားလှယ်များက ဖွဲ့စည်းပုံကို ရေးဆွဲရမည်ဟု ပြဌာန်းသည်။ (မှတ်ချက်။။ အဆိုပါဥပဒေသည် မည်သည့်အခါမှ အသက်မဝင်ခဲ့ပါ)

၁၉၉၂ အောက်တိုဘာ(၂)

နဝတက ၁၃/၉၂ အမိန့်ကို ထုတ်ပြန်သည်။ အမျိုးသားညီလာခံကို ကျင်းပမည်ဟုဆိုကာ ညီလာခံဦးတည်ချက် (၆) ချက်ကို ပြဌာန်းသည်။ ယင်းတို့အနက် ဦးတည်ချက် (၆) သည် နိုင်ငံတော်၏ အနာဂတ်နိုင်ငံရေး ဦးဆောင်မှုတွင် တပ်မတော်က ဦးဆောင်ရေးဟု ပါဝင်သည်။ ( မှတ်ချက်။ ။ အဆိုပါဦးတည်ချက် အမှတ် (၆) သည် အငြင်းအပွားရဆုံးအချက်ဖြစ်ပြီး ကျယ်ကျယ်ပြန့်ပြန့် သဘောမတူမှုများရှိခဲ့သော စစ်အစိုးရက ဘယ်သောအခါမှ မစွန့်လွှတ်ခဲ့ပါ)

၁၉၉၃ ဇန်နဝါရီ (၉)

အမျိုးသားညီလာခံ၏ ပထမဆုံးအပိုင်း စတင်သည်။ ကိုယ်စားလှယ် ၇ဝ၂ ဦးအနက် လွှတ်တော်ကိုယ်စားလှယ် ၉ဝ (၁၅ ရာခိုင်နှုန်း) သာ ပါဝင်ပြီး ကျန်အများစုက စစ်အုပ်စုက သူတို့စိတ်ကြိုက် ကိုယ်စားလှယ်များကို စေလွှတ်တက်ရောက်စေခဲ့သည်။ ညီလာခံစပြီး ၂ ရက်အကြာတွင် ညီလာခံ၏ လုပ်ထုံးလုပ်နည်းများအပေါ် မကျေနပ်မှုများ ကျယ်ပြန့်လာသဖြင့် ခေတ္တနားလိုက်ရသည်။

၁၉၉၃ ဧပြီ (၇)

ညီလာခံကိုယ်စားလှယ်များအနက် တိုင်းရင်းသားကိုယ်စားလှယ်များက ဗဟိုဦးစီးစနစ်ကို ဆန့်ကျင်ကန့်ကွက်သဖြင့် ရပ်ဆိုင်းလိုက်ရပြန်သည်။

၁၉၉၃ ဇွန် (၇)

ရန်ကုန်တိုင်းမှူး ဗိုလ်ချုပ်မျိုးညွန့်က ဖွဲ့စည်းပုံတွင် တပ်မတော်၏ နိုင်ငံရေးဦးဆောင်မှုကို ထည့်သွင်းရမည်ဟူသော အဖွင့်မိန့်ခွန်းဖြင့် ညီလာခံ ပြန်စသည်။

၁၉၉၃ သြဂုတ် (၄)

ညီလာခံကိုယ်စားလှယ် အန်အယ်ဒီမှ ဒေါက်တာအောင်ခင်ဆင့်သည် ညီလာခံကို ဝေဖန်သော စာဖြန့်ဝေသဖြင့် အဖမ်းခံရသည်။

၁၉၉၃ စက်တင်ဘာ (၁၆)

တိုင်းရင်းသားများက ဖက်ဒရယ်စနစ်ကို တင်ပြလာသဖြင့် ညီလာခံ တစခန်းရပ်သည်။ အစိုးရ၏ တရားဝင်ထုတ်ပြန်ချက်တွင် အခြေခံမူ ၁ဝ၄ ချက်ကို ချမှတ်နိုင်ပြီဟု ဆိုသည်။

၁၉၉၃ အောက်တိုဘာ (၁၅)

လှုပ်ရှားတက်ကြွသူ ၁၂ ဦးသည် ညီလာခံကို ဝေဖန်သဖြင့် ဖမ်းဆီးခံရသည်။ အမျိုးသားညီလာခံကို ဆက်လက်ကျင်းပနေသည်။

၁၉၉၅ ဇူလိုင် (၁ဝ)

ဒေါ်အောင်ဆန်းစုကြည်ကို နေအိမ်အကျယ်ချုပ်မှ ပြန်လွှတ်ပေးသည်။

၁၉၉၅ နိုဝင်ဘာ (၂၈)

အမျိုးသားဒီမိုကရေစီအဖွဲ့ချုပ်မှ ကိုယ်စားလှယ်များက ညီလာခံလုပ်ထုံးလုပ်နည်းများကို ပြန်လည်သုံးသပ်ရန် အဆိုပြုသည်။ ညီလာခံအတွင်း လွတ်လပ်စွာ ဆွေးနွေးငြင်းခုံခွင့် တောင်းဆိုရာ အာဏာပိုင်များက လက်မခံသဖြင့် အဖွဲ့ချုပ်ကိုယ်စားလှယ် ၈၆ ဦးစလုံး ညီလာခံကို သပိတ်မှောက်သည်၊

၁၉၉၅ နိုဝင်ဘာ (၂၉)

အန်အယ်ဒီကို ညီလာခံမှ ထုတ်ပစ်လိုက်သည်။

၁၉၉၅ ဒီဇင်ဘာ (၂၃)

ရှမ်းအမျိုးသား ဒီမိုကရေစီအဖွဲ့ချုပ်မှ အဆိုပြုချက်ဖြစ်သော အချုပ်အခြာအာဏာသည် လူထုထံမှ ဆင်းသက်ရမည်ဆိုသော အဆိုကို အာဏာပိုင်များက ပယ်ချသည်။

၁၉၉၆ မတ်လ (၃၁)

ညီလာခံကို ဆိုင်းငံ့ထားလိုက်သည်။ ၁၉၉၄မှ ၁၉၉၆ ညီလာခံအတွင်း ဖွဲ့စည်းပုံ၏ အရေးကြီးသော အစိတ်အပိုင်း တော်တော်များများကို ရေးဆွဲပြီးစီးခဲ့သည်ဟု ယုံကြည်ရသည်။

၁၉၉၆ ဇူလိုင် (၇)

ညီလာခံကို ကာကွယ်သည့်ဥပဒေ (၅၊၉၆)ကို ထုတ်ပြန်သည်။ ညီလာခံကို ဝေဖန်လျှင်၊ နှောင့်ယှက်လျှင် ထောင်ဒဏ် နှစ် (၂ဝ) ကျခံရမည်ဟူသော အမိန့်ဖြစ်သည်။

၂ဝဝ၃ မေလ၃ဝ ဒေါ်အောင်ဆန်းစုကြည်၏ အထက်မြန်မာပြည်ခရီးစဉ်အတွင်းဒီပဲယင်းလုပ်ကြံသတ်ဖြတ်မှုကို စစ်အစိုးရထောက်ခံသော ကြံ့ဖွံ့များက ဖန်တီးသည်။ အန္တရာယ်မှ လွတ်မြောက်သော ဒေါ်အောင်ဆန်းစုကြည်ကို နေအိမ်အကျယ်ချုပ်ဖြင့် ထိန်းသိမ်းထားလိုက်သည်။

၂ဝဝ၃ သြဂုတ် (၃ဝ)

ဗိုလ်ချုပ်ခင်ညွန့်သည် နိုင်ငံတော်ဝန်ကြီးချုပ် ဖြစ်လာပြီး သူ၏ ပထမဆုံးသော တိုင်းပြည်သို့မိန့်ခွန်းတွင် လမ်းပြမြေပုံ (၇) ချက်ကို မိတ်ဆက်ပေးသည်။ အဆင့် (၁)မှာ အမျိုးသားညီလာခံကို ပြန်စရေးဖြစ်ပြီး နောက်ဆုံးအဆင့်မှာ အရပ်သားအစိုးရသို့ အာဏာအပ်နှင်းရေး ဖြစ်သည်။

၂ဝဝ၄ မေ (၁၇)-ဇူလိုင် (၉)

ညီလာခံကို ကိုယ်စားလှယ် ၁ဝ၈၁ ဦးဖြင့် ပြန်စသည်။ အန်အယ်လ်ဒီကိုယ်စားလှယ်များ မပါဝင်တော့ပါ။ ၁၉၉ဝ ရွေးကောက်ခံ ကိုယ်စားလှယ် ၁၃ ဦးသာ တက်ရောက်သည်၊

၂ဝဝ၄ အောက်တိုဘာ ၁၉ ဗိုလ်ချုပ်ခင်ညွန့်ကို အမိန့်မနာခံမှု၊ လာဘ်စားမှုဖြင့် ဖမ်းဆီးလိုက်သည်။ သူ၏နောက်လိုက် တထောင်ကျော်ကိုလည်း လာဘ်စားမှုဖြင့် စွဲချက်တင်ဖမ်းဆီး ထောင်ချသည်။

၂ဝဝ၅ ဖေဖော်ဝါရီ (၁၇) - မတ် (၃၁)

ညီလာခံကို ကိုယ်စားလှယ် ၁ဝ၇၅ ဖြင့် ပြန်လည်ကျင်းပသည်။ ဤအပိုင်း ကျင်းပနေစဉ်အတွင်း ရှမ်းအမျိုးသား ဒီမိုကရေစီအဖွဲ့ချုပ် ခေါင်းဆောင် ဦးခွန်ထွန်းကို ဖမ်းဆီးလိုက်သဖြင့် သူ၏အဖွဲ့မှ ကိုယ်စားလှယ်များအားလုံး ညီလာခံကို ကျောခိုင်သွားကြသည်။

၂ဝဝ၅ ဒီဇင်ဘာ (၅) - (၂၉)

ညီလာခံ စတုတ္ထပိုင်းကို ကျင်းပသည်။

၂ဝဝ၇ ဇူလိုင် (၁၈) - စက်တင်ဘာ (၃)

နောက်ဆုံးအပိုင်းကို ကျင်းပသည်။

၂ဝဝ၇ အောက်တိုဘာ (၁၈)

ဦးအောင်တိုး ဦးဆောင်သော မူကြမ်းအချောသတ်ရေး ကော်မတီကို ဖွဲ့စည်းသည်။

၂ဝဝ၈ ဖေဖော်ဝါရီ (၉)

မေလဆန္ဒခံယူပွဲနှင့် ၂ဝ၁ဝ ရွေးကောက်ပွဲအစီအစဉ်ကို တရားဝင်ကြေညာသည်။

၂ဝဝ၈ ဖေဖော်ဝါရီ (၁၉)

ဖွဲ့စည်းပုံအချောသတ်ရေး ကော်မတီက အချောပြီးကြောင်း ကြေညာသည်။

၂ဝဝ၈ မေ (၁ဝ)

အနည်းဆုံး လူတသိန်းကျော် မေ ၂ ရက်နှင့် ၃ ရက်နေ့တွင် တိုက်ခတ်သော နာဂစ်လေမုန်တိုင်းကြောင့် သေဆုံးခဲ့ပြီး မကြုံစဖူး ကြီးမားလှသော အပျက်အစီးဒဏ် မြန်မာနိုင်ငံတွင် ရင်ဆိုင်နေရသော်လည်း ၄၇ မြို့နယ်မှအပ နိုင်ငံတဝှမ်းလုံးတွင် အခြေခံဥပဒေမူကြမ်း ဆန္ဒခံယူပွဲကို စစ်အစိုးရက ကျင်းပခဲ့သည်။

၂ဝဝ၈ မေ (၁၅)

ပြုလုပ်ခဲ့ပြီးသော ဆန္ဒခံယူမှုများ၏ ရလာဒ်တွင် အခြေခံဥပဒေမူကြမ်းကို မဲပေးပိုင်ခွင့်ရှိသူ ၉၂.၄ ရာခိုင်နှုန်းက ထောက်ခံမဲပေး အတည်ပြု လိုက်ကြောင်း ဆန္ဒခံယူပွဲ ကျင်းပရေးကော်မရှင် ဥက္ကဌ ဦးအောင်တိုးက နိုင်ငံပိုင် ရေဒီယိုမှတဆင့် ကြေငြာသွားသည်။ ကျန်ရှိနေသော မုန်တိုင်းဒဏ် ဆိုးရွားစွာခံခဲ့ရသော ဧရာဝတီတိုင်းနှင့် ရန်ကုန် တိုင်းအတွင်းရှိ ၄၇ မြို့နယ်ကိုလည်း သတ်မှတ်ထားသည့်အတိုင်း မေ ၂၄ ရက်နေ့တွင် ဆန္ဒခံယူပွဲ ပြုလုပ်မည်ဟုလည်း ပါရှိသည်။ အမျိုးသားဒီမိုကရေစီအဖွဲ့ချုပ်က ဆန္ဒခံယူပွဲရလာဒ်ကို တရားမဝင်ဆိုကာ ယတိပြတ် ပယ်ချလိုက်သည်။